ཁྱེད་ཀྱིས་མངོན་ཤེས་བསྒྲུབ་རན་འདུག
འདོན་སྤེལ། ༢༠༡༡/༠༢/༠༥

ད་ཁྱོད་རང་གིས་མངོན་ཤེས་བསྒྲུབ་རན་རེད།

ཨ་འདུས་མིག་ཆུ། ས་རཱ།

གླེང་གཞི།

མི་ཚེ་མི་རིགས་དང་རྒྱལ་ཁབ། རིག་གཞུང་དང་བཅས་པའི་ཆེད་དུ་ཕུལ་ཞིང་། དེའང་དཀའ་ཚེགས་རྐྱང་རྐྱང་གི་ཁྲོད་ནས་མི་རིགས་ཤིག་གི་བདེན་དོན་རྩོད་པ་དང་། རིག་གཞུང་ཞིག་གི་ཚེ་སྲོག་སྲོང་སྐྱོང་ཐད་ལ་སྒོ་ཀུན་ནས་འབད་པ་རྐྱང་རྐྱང་གིས་དུས་འདའ་བའི་བཀའ་ཟུར་བཀྲས་མཐོང་མཆོག་ལབ་ན། ང་ཚོ་མགོ་ནག་མི་ཡོད་ཚད་དགའ་དགོས་པ་དང་། ཁོང་གི་མཛད་རྗེས་ལ་ཡི་རངས་བྱ་དགོས་པའི་གནས་སུ་མཐོང་ནའང་། རང་ཕྱོགས་བསྟོད་ནས་ལྷ་རུ་བཀུར་བ་དང་། གཞན་ཕྱོགས་སྨད་ནས་འདྲེ་རུ་བརྫངས་པའི་ངན་གཤིས་འདི་འུ་ཚོའི་སྤྱི་ཚོགས་ན་ཨེ་ཙེ་ན་ཚ་བཞིན་འགོས་ཁྱབ་འགྲོ་བཞིན་པའི་རྐྱེན་གྱིས་བཀའ་ཟུར་ཁོང་གི་སྒོར་འབུམ་དགུ་ཡི་རྙོག་གླེང་དེར། མི་འགའ་ཞིག་ལ་གསལ་བཤད་གང་གིས་ཀྱང་མ་ཕན་པར་གླེང་ཕྱོགས་འདྲ་མིན་བཟོ་བཞིན་པར་བློས་མ་བཟོད་ནས་རྩོམ་ཡིག་འདི་འབྲི་བའི་ཁུལ་བྱས་པ་ཡིན།

“ ཁྱེད་ཀྱིས་འབུམ་དགུ་བཟས་སོང་སྐད་དེ་ལ་གསར་བཤད་ཅིག་བྱེད་རོགས ” དྲི་བ་འདི་ཐོག་དང་པོར་གོ་དུས་དྲི་བ་གཏོང་མཁན་དེས་མི་རིགས་དང་རྒྱལ་ཁབ་ཀྱི་ཆེད་དུ་ཁྱེད་ཀྱིས་དེ་བདེན་པ་ཡིན་མིན་གྱི་ལན་གསལ་བོ་ཞིག་གནང་རོགས་ཞེས་སྐད་སྙན་སྙན་དང་། ཚིག་འཇམ་འཇམ་གྱིས་བཤད་ཡོང་ལ། སྐད་ཆ་འདི་བསམ་བློ་གང་ཡང་མ་བཏང་བར་ཉན་ན། སྙན་ལྷང་ལྷང་ཞིག་དང་ངོ་མ་ལྷག་བསམ་གྱིས་ཁུར་ལ་བླངས་པའི་སྐད་ཆ་སྙིང་ལ་རྗེ་བ་ཞིག་ཏུ་སྣང་མོད། དོན་དངོས་ཁྱེད་ཀྱིས་འཛུམ་ཤིག་ཤིག་དང་ཚིག་འཇམ་འཇམ་གྱི་སྐད་ཆ་དེའི་རྒྱབ་ཡོལ་ཕག་ལ་བསམ་གཞིག་ཅིག་བྱས་ན། དེ་ནི་ཁ་འཇམ་ཞིང་ཁོག་རྩུབ་པའི་གནད་དོན་ཡ་མ་ཟུང་ཞིག་ལས་མ་འདས་ཤིང་། དེ་ནི་སྐུ་ངོ་བཀྲས་མཐོང་ལགས་མི་ནག་བྱས་ནག་ཞིག་ཏུ་བཟོ་འདོད་ཀྱིས་ཀུན་ནས་བསླངས་པའི་གནོད་སེམས་རྣལ་མ་ཞིག་ལས་སྐྱེས་པ་འོང་པ་ཤེས་ངེས་ཡིན།

དོན་དངོས་སྐུ་ངོ་བཀྲས་མཐོང་བསྟན་འཛིན་ལགས་ཀྱི་མི་ཚེའི་བྱ་བཞག་རིང་མོའི་ཁྲོད། བོད་དང་རིག་གཞུང་གི་སླད་དུ་ཕྱག་ལས་གང་འདྲ་ཞིག་གནང་ཡོད་མེད་ཀྱི་མཛད་རྗེས་ལ་མི་ཕྱོགས་པར་སྒོར་མོ་འབུམ་འགའ་ཞིག་གི་གླེང་རྙོག་གིས་མི་བུ་ཆེན་པོ་འདི་ནག་པོར་བཟོ་བར་འདོད་པ་ནི། ཁྱེད་ཀྱིས་མི་རིགས་དང་རྒྱལ་ཁབ་སླད་དུ་ཞེས་ཇི་ལྟར་ཁ་དབྱངས་བོས་ཀྱང་ང་ཡིས། ཁྱེད་ཀྱི་རང་དོན་ཙམ་ལས་རྒྱལ་ཁབ་དང་མི་རིགས་ཀྱི་ཆེད་དུ་ཡིན་པ་གཞར་ཡང་མི་འདོད་དོ།

ཁྱེད་ཀྱིས་འདྲི་འདོད་པའི་སྐད་ཆ་འདིའམ་དྲི་བ་ཆོ་མེད་དེར་སྐུ་ངོ་རང་གིས་ལན་གསལ་བོ་བསྐྱོན་ཡོད་པ་དང་། དེས་མ་འཐུས་ན་བོད་གཞུང་བཀའ་ཤག་གི་ངོས་ནས་ལན་གསལ་ཐག་ཆོད་པ་ཞིག་བརྒྱབས་ཡོད་པ་དེ་དག་གིས་ཀྱང་ཁྱེད་ཀྱི་འདོད་བློ་མི་ཁེངས་ན། ད་ནི་ཁྱེད་རང་ལ་ལམ་ཁ་གཞན་ཞིག་ཡོད་པ་ནི། རང་ཉིད་ཀྱིས་མངོན་ཤེས་བསྒྲུབས་ཏེ་སྐུ་ངོ་ཁོང་གི་མི་ཚེའི་བྱ་གཞག་ལ་བརྟགས་དཔྱད་ཞིབ་མོ་བྱ་རྒྱུ་ལས་གཞན་གང་ཡང་མེད་དོ།།

དེ་ནི་ཁྱེད་ཀྱིས་རྒྱང་འཕེན་པ་ཇི་བཞིན་གཞན་གྱིས་བཤད་པར་བློ་ཡིད་མི་ཆེས་པར་རང་ཉིད་ཀྱིས་མ་མཐོང་བར་ཁས་མི་ལེན་པའི་ཆ་ནས་མངོན་ཤེས་བསྒྲུབ་ན་མ་གཏོགས། ཁྱེད་ཀྱི་རྣམ་རྟོག་དེ་སེལ་བའི་ལན་རྒྱག་མཁན་ཞིག་གཞར་ཡང་མི་རྙེད་དོ།།

ཁྱེད་དང་ཁྱེད་འདྲ་བ་སུ་འདྲ་ཞིག་ཡིན་ཡང་རང་ཕྱོགས་འདི་ཁོ་ན་རྒྱལ་བའི་ཆེད་དུ། གཞན་ཕྱོགས་ཀྱི་མི་ཚེའི་དཀའ་སྡུག་ཁྲོད་དུ་བོད་མི་རིགས་ལ་བཞག་པའི་ཕྱག་རྗེས་གང་མང་ཞིག་སུབ་ཀྱང་གསུབ་མི་ནུས་པ་དག། ཁྱེད་ཀྱིས་གླེང་ཕྱོགས་ཆུང་ཆུང་ཞིག་ཁ་ནང་དུ་འཕྲེད་དུ་བཟུང་ནས་ཆེན་པོ་ཞིག་ཡིན་མདོག་གིས་དཀར་པོ་ཞིག་ནག་པོར་བཟོ་འདོད་པ་ནི་སྟོང་བསམ་ཆེན་མོ་རེད་དོ།།

དཔྱོད་ཤེས་ཀྱི་རྒྱ་མས་ཚད་ཐིག་ལ་མི་ལེན་པར། གཡག་ཞར་གྱིས་རྩྭ་བཟའ་བ་ལྟར་ལབ་བརྡོལ་གྱི་སྐད་ཆ་གང་མང་ཞིག་བཤད་པར་བརྩོན་པ་ནི། ཕྱོགས་གཅིག་ནས་སྐུ་ངོ་བཀྲས་མཐོང་ལ་ངན་སྨྲས་བྱེད་པའི་སྣང་ཚུལ་ཞིག་མཐོང་ན་ཡང་། ཕྱོགས་གཞན་ཞིག་ནས་བོད་མི་མང་དང་། བོད་མི་མང་མགོ་ཐོག་གི་བཙན་བྱོལ་བོད་གཞུང་ཡང་མིག་ནང་ལ་མ་བཞག་པའི་འདུ་ཤེས་ཤིག་ཡོངས་སུ་སྐྱེ་འཇུག་ཏེ། བཙན་བྱོལ་བོད་གཞུང་གི་དབུས་འོས་བསྡུ་ལས་ཁུངས་ཀྱིས་བཀའ་ཁྲིའི་འོས་མི་གསུམ་གཏན་འཁེལ་ཞིང་ཡོངས་བསྒྲགས་བྱས་ཟིན་པའི་ཁྲོད་ན་ཁྱེད་ཅག་གིས་ནག་པོ་རུ་བཞེངས་བསྐྲུན་བྱེད་འདོད་པའི་སྐུ་ངོ་བཀྲས་མཐོང་མཆོག་ཡོད་པ་མ་ཟད། ཁོང་གི་ཞབས་འོག་ནས་གནམ་ལ་འདེགས་མཁན་གྱི་བོད་མི་དེ་འདྲ་མང་པོ་ཞིག་ཡོད་པས་སོ།།

ཁྱེད་ཚོས་སྐུ་ངོ་ཁོང་ལ་ཚ་འདྲི་གཏིང་འདྲི་བྱེད་སྟངས་ལ་བལྟས་ན། བཙན་བྱོལ་བོད་གཞུང་དབུས་འོས་བསྡུ་ལས་ཁུངས་ཀྱིས་མ་ཡོང་བ་དང་། ཁོང་གི་རྒྱབ་སྐྱོར་བ་དེ་འདྲ་མང་པོ་ཞིག་ནོར་སོང་བ་དང་འཁྲུལ་སོང་བའི་འདོད་ཚུལ་ཞིག་ཁྱེད་ཅག་གི་ཁོག་ན་མེ་རླབས་བཞིན་འབར་གྱིན་ཡོད་ནའང་། ཁ་ནས་དུ་བ་མ་གཏོགས་མི་འབྱིན་པ་ནི། ངས་གོང་ན་བཤད་པའི་ཁ་ཡག་ཁོག་རྩུབ་དེ་ལས་མ་འདས་སོ།།

ང་སྤྱིར་ཡིན་ན་༸གོང་ས་མཆོག་ཞལ་བཞུགས་པའི་སྐབས་འདིར་གཞོན་སྐྱེས་ཤིག་བཀའ་ཁྲིར་འོང་དགོས་པའི་འདོད་ཚུལ་འཛིན་མཁན་ཞིག་ཡིན་ལ། དེ་ལྟར་རང་ཉིད་ཀྱིས་ཀྱང་གཞོན་སྐྱེས་ཤིག་འོང་ཐབས་སུ་འོས་གཅིག་པོའི་ཐོབ་ཐང་ དེ་འཁྱེར་ནས་གཞོན་སྐྱེས་འོས་མི་ཞིག་ལ་འོས་འཕེན་བཞིན་ཡོད་ནའང་། སྐུ་ངོ་ཁོང་གིས་མི་ཚེའི་ནང་བཞག་པའི་རླབས་ཆེན་གྱི་མཛད་རྗེས་དེ་དག་ཕོང་ཕྱིས་ཤོག་བུ་བཞིན་རྒྱང་དུ་དོར་ནས་སྒོར་འབུམ་དགའ་ཞིག་གི་གླེང་རྙོག་ཅིག་ཁ་རུ་འཁྱེར་ནས་སྐུ་ངོ་ཁོང་གང་དུ་སོང་ཡང་དེ་ཡིས་ཚ་འདྲི་གཏིང་འདྲི་བྱས་ཏེ་སུན་གཙེར་བྱེད་པ་ནི། དོན་དངོས་བློས་མི་བཟོད་པའི་སྐད་ཆ་ཆོ་མེད་ཅིག་རེད་དོ།།

མདོར་ན་ང་ཚོ་སུ་ཡིན་ཡང་རང་གི་འདོད་ཕྱོགས་དེ་རྒྱལ་བར་མི་འདོད་མཁན་སུ་ཡང་མེད་མོད་རང་ཕྱོགས་འདི་ཁོ་ན་རྒྱལ་བའི་ཆེད་དུ། རང་མི་དེ་སྐྱོན་ཀུན་ཟད་དང་ཡོན་ཀུན་ལྡན་དུ་བཤད་པ་དང་། གཞན་ཕྱོགས་དེ་ཕམ་པའི་སླད་སྔར་ཡོད་མཛད་རྗེས་གང་ཡོད་མ་ཤེས་མ་མཐོང་ཁུལ་གྱིས་ནག་ཉེས་ཀྱི་ཞྭ་མོ་རྐྱང་རྐྱང་བཟོ་ཐབས་ལ་འབད་པ་ནི། སྤྱི་ཚོགས་ཡག་པོ་ཞིག་གི་བྱེད་སྟངས་གཏན་ནས་མ་ཡིན་ནོ།།

གང་ལྟར་ངས་ནི་རྗེས་ཕྱོགས་སུ་བཀའ་ཁྲི་བྱུང་ན་དེ་ནི་རང་ཉིད་ཀྱི་མགོ་ཁྲིད་དང་། རང་ཉིད་ཀྱིས་བཀུར་འོས་པའི་བཀའ་ཁྲི་རུ་བརྩི་རྒྱུ་ལས་གཞན་གང་ཡང་མེད་དོ། །བོད་ཀྱི་མ་འོངས་བཀའ་ཁྲི་རྒྱལ་ལོ། བོད་རྒྱལ་ལོ།


ཤོག་ངོས་འདི་ཐེངས་ ༨༣༧ ལ་བཀླགས་འདུག